कान्तिपुर अर्काइभ [अर्काइभ] गिरिजाप्रसादले कोदालोले खोस्रेको ओखलढुंगा सडक
![[Archive] Okhaldhunga road plowed by Girijaprasad](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2025/third-party/archive-2332025121308.jpg&w=1001&h=0)
काठमाडौँ — घरायसी सामान ओखलढुंगा पुर्याउन उदयपुरको कटारीबाट भरिया र ढाक्रेलाई प्रतिकिलो १० रुपैयाँ ज्याला दिनुपर्थ्यो । ओखलढुंगा र सोलुखुम्बु आउजाउ गर्ने पैदलयात्रीको लर्को देखिन्थ्यो । भरियाहरू ठाउँठाउँमा भारी बिसाएर बसेका भेटिन्थे ।
बाटैमा भात र ढिँडो पकाएर खान्थे । त्यस भेगका बासिन्दाले आफ्नो जीवनभर गाउँ सडक सञ्जालले जोडिने र गाडी चढेर घर पुग्ने कल्पना दिवा–सपनाजस्तै ठान्थे ।
त्यस भेगलाई सडक यातायातसँग जोड्न २०४६ सालको राजनीतिक परिवर्तनपछि कटारी–ओखलढुंगा सडक बनाउने योजना बन्यो । तत्कालीन प्रधानमन्त्री गिरिजाप्रसाद कोइरालाले उक्त सडक शाही नेपाली सेनाले बनाउने घोषणा गरे । सरकारको निर्णय अनुसार सेनाले सडक बनाउने योजना कार्यान्वयन गर्न गिरिजाप्रसादले कोदालोले खोस्रेर २०५० वैशाख २५ गते कटारी–ओखलढुंगा सडकको शिलान्यास गरेका थिए ।
ओखलढुंगा, सोलु, उदयपुर, सिन्धुली र खोटाङबासीका लागि उक्त सडक कोसेढुंगा भनिन्थ्यो । सडक निर्माणले त्यस भेगका बासिन्दाको टाउकोबाट नाम्लो हट्ने भन्दै खुसीयाली छाएको थियो ।
शिलान्यास कार्यक्रममा प्रधानमन्त्री कोइरालाले मुलुकमा उद्योगहरूको प्रवर्द्धनमा यस्ता सडकको ठूलो योगदान हुने चर्चा गरेका थिए । कोइरालाले सडक बनाउन सहयोग गर्न स्थानीयवासीलाई आह्वान गरेका थिए । उनले उक्त सडक निर्माणले राष्ट्र निर्माण प्रक्रियामा ठूलो सहयोग पुग्ने बताएका थिए ।
उक्त सडक निर्माण गर्न कोदालो, सावेल, घन, छिनोलगायतका स्थानीय औजार प्रयोग गर्ने उद्देश्य राखिएको थियो । त्यतिबेला कटारीसम्म मात्र मोटर जान्थ्यो । नेपाली सेनाले १ अर्ब ५ करोड ६६ लाख रुपैयाँ लगानीमा निर्माण गर्ने कटारी–ओखलढुंगा सडक १ सय ५ किमि रहेको थियो । उक्त सडक बनाउन एक पटकमा १ हजार ५ सय सैनिक परिचालन गर्ने योजना बनाइएको थियो ।
सुनकोशीमा २ सय १८ मिटर लामो मोटरेबल पुल, १७ वटा ससाना पुल र कल्भर्टहरू बनाउने योजनासहित बढीमा ८ वर्षमा पूरा गर्ने लक्ष्य राखेर सडक निर्माण सुरु गरिएको थियो । पहिलो आर्थिक वर्षमा सडकका लागि २० करोड विनियोजन गरिएको थियो । सडक शिलान्यासमा प्रधानमन्त्री कोइराला, तत्कालीन भौतिक योजना मन्त्री बलबहादुर राई, सेनाका प्रमुख गडुलशमशेर राणालगायतले सडक निर्माणले देशको विकासमा पुर्याउने योगदानको चर्चा गरेका थिए ।
सेनाले यसअघि त्रिशूली र सल्लाघारी नगरकोट सडक बनाएको थियो । सेनालाई सडक निर्माणमा लगाउने निर्णय सकारात्मक रूपमा हेरिएको थियो । हिले–भोजपुर सडक पनि सेनाले निर्माण गर्ने योजना बनाइएको थियो । सडक बनाउन खटिने सेनाललाई अतिरिक्त तलब, कपडालगायत प्रोत्साहनका लागि थप सुविधा प्रदान गर्ने जानकारी प्रधानसेनापति राणाले दिएका थिए ।
हिमाली र विकट जिल्ला छिचोल्न सेनाको परिचालनबाट निर्माण हुने उक्त सडकलाई बहुदलीय व्यवस्था प्राप्तिपछिको महत्त्वपूर्ण योजनाका रूपमा हेरिएको थियो । सडक शिलान्यास र यसमा जोडिएका सन्दर्भलाई समेटेर कान्तिपुर दैनिकले २०५० वैशाख २६ मा ‘कटारी–ओखलढुंगा सडकको शिलान्यास’ शीर्षकमा पहिलो पृष्ठमा समाचार प्रकाशन गरेको थियो ।
प्रस्तुति : ऋषिराम पौड्याल
प्रकाशित : चैत्र १०, २०८१ १७:०१https://ekantipur.com/Kantipur-Archive/2025/03/23/okhaldhunga-road-cleared-by-girija-prasad-with-a-spade-41-51.html
Comments
Post a Comment